Deputat: Dünya Azərbaycanlılarının Həmrəyliyi Günü dövlətçiliyimizin daha da möhkəmlənməsində böyük rol oynadı
Bakı, 31 dekabr, AZƏRTAC
Xalqın adət-ənənələri də, milli mentaliteti də dövlətçiliyə sədaqət əsasında formalaşıb. Təbii ki, bu, tarixi şəxsiyyətlərin dühası ilə, Vətən və dövlətçilik sevgisi ilə gerçəkləşir. Bu həqiqət dövlətin də, xalqın da mövcudluğu və dünyəvi proseslərə inteqrasiya kimi amillərə stimul olur.
Müasir Azərbaycanın dövlətçilik memarı olan böyük tarixi şəxsiyyət, ümummilli lider Heydər Əliyev azərbaycançılıq ideologiyasının əsasını qoydu və bu ideologiya ölkəmizi dünyada tanıtdı. Dünya Azərbaycanlılarının Həmrəyliyi Günü də azərbaycançılıq ideologiyasından yaranıb.
Bu fikirləri AZƏRTAC-a açıqlamasında Milli Məclisin deputatı Səbinə Xasayeva söyləyib.
Deputat bildirib ki, ulu öndər Heydər Əliyevin təşəbbüsü ilə 1991-ci il dekabrın 16-da Naxçıvan Muxtar Respublikası Ali Məclisinin iclasında 31 dekabrın Dünya Azərbaycanlılarının Həmrəyliyi Günü kimi qeyd olunması haqqında Qərar qəbul edildi. Azərbaycan Respublikası Ali Sovetinin Milli Şurası dekabrın 31-nin Dünya Azərbaycanlılarının Həmrəyliyi Günü elan olunması barədə Qanun qəbul etdi. 2001-ci il noyabrın 9-10-da Dünya Azərbaycanlılarının I qurultayı keçirildi. 19 il sonra biz bu tarixin müqəddəsliyini Vətən müharibəsindəki Zəfərimizlə yenidən yaşadıq. Qurultayda dünyanın 36 ölkəsində yaşayan azərbaycanlıları təmsil edən 200-dən çox təşkilatdan 406 nümayəndə iştirak etdi. Bu qurultayda ölkəmizin, azərbaycanlıların daha nurlu sabahları üçün çalışanlar ən böyük azərbaycanlının - böyük tarixi şəxsiyyət Heydər Əliyevin Azərbaycan naminə dəyərli tövsiyələrini dinlədilər, bu tövsiyələr də tarixləşdi. Nümayəndələr dünyəvi siyasətdə azərbaycançılığın yerinin möhkəmləndirilməsi üçün nələr etməyin, necə etməyin nəzəri əsaslarını da öyrəndilər.
“Dünya Azərbaycanlılarının I Qurultayının keçirilməsinin həm Azərbaycan üçün, həm də bütün dünya azərbaycanlıları üçün çox əhəmiyyətli olduğunu qeyd edən Ulu Öndər vurğuladı ki, dünyanın müxtəlif ölkələrində yaşayan azərbaycanlıların bir-biri ilə daha da sıx əlaqə qurması, öz həmrəyliklərini bəyan etməsi və müstəqil Azərbaycan dövləti ilə əlaqələr yaratması tarixin bu mərhələsində çox əhəmiyyətli bir vəzifə kimi meydana çıxır. Ölkəmizin xaricində yaşayan azərbaycanlılar müstəqil Azərbaycan ilə daha da sıx əlaqələr qurmalı, azərbaycanlıların birliyinin, həmrəyliyinin təmin olunması üçün çalışmalıdır. Ulu Öndərin “Xalqları dil qədər, milli-mənəvi ənənələr qədər, dəyərlər qədər birləşdirən başqa bir vasitə yoxdur. Biz bu vasitədən daim istifadə etməliyik” fikri qurultayın leytmotivi kimi dinlənilmişdi”.
Qurultayda Dünya Azərbaycanlılarının I Qurultayının qətnaməsi ilə, nümayəndələrin bütün dünya azərbaycanlılarına müraciəti ilə bərabər Dağlıq Qarabağ münaqişəsi ilə əlaqədar dünya ictimaiyyətinə, beynəlxalq təşkilatlara, xarici ölkələrin hökumət rəhbərlərinə və parlamentlərinə müraciətlər də qəbul olundu. BMT Təhlükəsizlik Şurasının qətnamələrini qəbul etməyən Ermənistana ciddi beynəlxalq təzyiq göstərməyən dünya ölkələri bu müraciəti Azərbaycan Ordusunun həll edəcəyini bilməli idi. 19 il sonra dünya dövlətləri gördü ki, Prezident İlham Əliyevin qürurla dediyi “Azərbaycan güclü dövlətdir və onun güclü ordusu vardır” xəbərdarlığı nə qədər real gücə əsaslanırmış. Dünya Azərbaycanlılarının Həmrəyliyi Günü Azərbaycan dövlətçiliyinin daha da möhkəmlənməsində, qüdrətlənməsində böyük rol oynadı və Heydər Əliyev dühasının bəşəriliyinə düşən işıq oldu”, - deyə S.Xasayeva vurğulayıb.
Deputat qeyd edib ki, “Mən azərbaycanlıyam!” deyən hər bir azərbaycanlı bu günün mahiyyətini yaşam fəlsəfəsi bilir, ömrünü bu fəlsəfənin işığında yaşayır: “Xalqımız 20 ildir belə kəlamların bəşəri dərkinin cazibəsində yaşayır, azərbaycançılıq üçün yaşayır, dövlətçiliyimizin qorunması, müstəqilliyimiz uğrunda çalışır. Azərbaycançılıq ideologiyasında ruhlanan xalqımız və onun ordusu Prezident, Müzəffər Ali Baş Komandan İlham Əliyevin sərkərdəliyi ilə işğala son qoydu, ərazi bütövlüyümüz bərpa olundu”.
Xalqımızı Dünya Azərbaycanlılarının Həmrəyliyi Günü münasibəti ilə təbrik edən S.Xasayeva Böyük Qayıdış prosesinin də uğurla başa çatacağına əminliyini ifadə edib.
Bölmənin digər xəbərləri
