Mərakeşdə Dünya Azərbaycanlılarının Həmrəyliyi Günü münasibətilə tədbir keçirilib
Rabat, 30 dekabr, AZƏRTAC
Azərbaycan Respublikasının Mərakeş Krallığındakı səfirliyi və Mərakeş-Azərbaycan Dostluq Cəmiyyətinin təşkilatçılığı ilə səfirlikdə 31 Dekabr - Dünya Azərbaycanlılarının Həmrəyliyi Günü və Yeni il münasibətilə tədbir keçirilib.
AZƏRTAC xəbər verir ki, ölkəmizin Mərakeşdəki səfiri Oktay Qurbanov çıxışında 31 Dekabrın Dünya Azərbaycanlılarının Həmrəyliyi Günü kimi qeyd olunmasının tarixi barədə danışıb, bu bayramın Azərbaycan və dünyada yaşayan azərbaycanlıların milli birliyi baxımından əhəmiyyətindən söz açıb. O.Qurbanov bu bayramın əsasının ümummilli lider Heydər Əliyevin hələ Naxçıvan Muxtar Respublikası Ali Məclisinin Sədri olarkən onun təşəbbüsü və 1991-ci il 16 dekabr tarixli qərarı ilə qoyulduğunu bildirib.
Səfir ümummilli lider Heydər Əliyevin ölkə rəhbərliyinə gəldikdən sonra da siyasətinin prioritet istiqamətlərindən biri kimi xaricdə yaşayan azərbaycanlılar arasında milli birliyin, onların Vətənlə bağlılıqlarının qurulması olduğunu vurğulayıb, bunun bariz sübutu kimi məhz Ümummilli Liderin təşəbbüsü ilə 2001-ci il noyabrın 9-da Dünya Azərbaycanlılarının I Qurultayının keçirildiyini və bundan qısa müddət sonra - 2002-ci il iyulun 5-də Xaricdə Yaşayan Azərbaycanlılarla İş üzrə Dövlət Komitəsinin yaradılması barədə Fərman verildiyini qeyd edib.
Səfir O.Qurbanov bu tarixi Fərmanla dünyada yaşayan soydaşlarımızın milli ideya - azərbaycançılıq ideyası ətrafında birləşməsinin dövlət siyasəti səviyyəsinə qaldırıldığını və bu istiqamətdə bir çox dövlət proqramlarının həyata keçirildiyini vurğulayıb.
O.Qurbanov çıxışında, həmçinin ümummilli lider Heydər Əliyevin siyasi varisi olan Prezident İlham Əliyevin də siyasi kursunun əsas istiqamətlərindən birinin dünya azərbaycanlılarının həmrəyliyi, onların milli amal uğrunda birləşməsi yönündə apardığı uğurlu siyasətin təşkil etdiyini söyləyib. Səfir Prezident İlham Əliyevin bu məsələni daim diqqətdə saxladığını və məhz onun təşəbbüsü ilə müxtəlif ölkələrdə yaşayan soydaşlarımızın diaspor təşkilatlarının formalaşdırıldığını, onların fəaliyyət strategiyasının qurulduğunu bildirib. O.Qurbanov ölkə rəhbərinin bu yöndəki uğurlu siyasətinin tərkib hissəsi və diaspor quruculuğuna verdiyi töhfəyə misal olaraq Prezident İlham Əliyevin Sərəncamı ilə 2008-ci il noyabrın 19-da Xaricdə Yaşayan Azərbaycanlılarla İş üzrə Dövlət Komitəsinin əsasında Diasporla İş üzrə Dövlət Komitəsinin yaradıldığını diqqətə çatdırıb.
Sonra çıxış edən Mərakeş-Azərbaycan Dostluq Cəmiyyətinin sədri M.Fəqiri Dünya Azərbaycanlılarının Həmrəyliyi Günü münasibətilə rəhbəri olduğu cəmiyyətin adından Azərbaycan xalqını təbrik edib. M.Fəqiri bu əlamətdar günün dövlət bayramı kimi qeyd olunmasının çox gözəl ideya olduğunu bildirib, xaricdə çoxlu mərakeşlinin yaşadığını nəzərə alaraq, Azərbaycanın bu təcrübəsindən Mərakeşin də bəhrələnməli olduğunu və dünya mərakeşlilərinin həmrəylik gününün rəsmi dövlət bayramı kimi təsis olunmasını arzuladığını qeyd edib.
Tədbirdə Mərakeş-Azərbaycan Dostluq Cəmiyyətinin üzvləri ilə yanaşı, tanınmış ictimai xadimlər və SSRİ dövründə Azərbaycan təhsil ocaqlarından məzun olmuş şəxslər iştirak ediblər.
Sonda qonaqlar üçün ziyafət təşkil olunub.
Nigar Cəfərli
AZƏRTAC-ın xüsusi müxbiri
Rabat
Bölmənin digər xəbərləri
