Şuşa döyüşləri - hərb tarixinin yeni səhifəsi
Bakı, 30 dekabr, AZƏRTAC
Azərbaycanın inkişaf yolunun təməlləri ulu öndər Heydər Əliyev tərəfindən qoyulub və hal-hazırda bu yol layiqincə Ali Baş Komandan İlham Əliyev tərəfindən davam etdirilir. Azərbaycanın beynəlxalq miqyasda söz sahibinə çevrilməsinin, həmçinin regionda siyasi lider olmasının da müəllifi məhz cənab Prezident İlham Əliyevdir.
Bu gün Azərbaycan bir dövlət olaraq sürətlə inkişaf edir və regionda güc mərkəzinə çevrilir. Əldə edilən uğurlar, nailiyyət və qalibiyyətlər beynəlxalq arenada siyasi mövqeyimizi əhəmiyyətli dərəcədə gücləndirir. Regionda yaratdığımız siyasi reallıqların özlüyündə məharətlə irəli sürülmüş siyasi fikirlər və sülhə çağırış dayanır.
AZƏRTAC xəbər verir ki, bu fikirləri Milli Məclisin deputatı Şahin Seyidzadə söyləyib.
Deputat bildirib ki, bu günün reallığında Azərbaycan, makroiqtisadi baxımdan sabit, təhlükəsiz ölkə və həmçinin Avropanın enerji ilə təmin edilməsində etibarlı tərəfdaşdır.
Ötən illərə nəzər yetirərək deyə bilərik ki, müstəqil Azərbaycanın çoxsaylı titulları arasına “Qalib dövlət” titulu da əlavə edildi.
Möhtəşəm qələbəmizin nəticəsi olaraq, 30 ilə yaxın bir müddətdə erməni işğalı altında qalan torpaqlarımız azad edildi və Qarabağ münaqişəsinə son qoyuldu.
Müasir texnologiyalara sahiblənən, yeni nəsil silahlarla təchiz edilmiş müzəffər ordumuz 44 gün ərzində 30 illik böyük bir həsrətə son qoydu və qəhrəmanlıq dastanı yazdı.
Bu möhtəşəm Qələbədən sonra Azərbaycan regionda, xüsusilə də Qafqazda marağı olan böyük dövlətləri qarşılıqlı münasibətlərinə yenidən baxmağa məcbur etdi. Həmçinin Azərbaycan bütün dünya ictimaiyyətinə öz böyük Zəfəri ilə gücünü, qüdrətini, milli həmrəyliyini, Prezident İlham Əliyev vasitəsilə isə mahir sərkərdəlik bacarığını göstərdi.
Bu gün müstəqil Azərbaycan 44 günlük Vətən müharibəsindən sonra regionda yaratdığı bütün dövlətlərə, xalqlara dostluq, sülh və mehriban qonşuluq şəraitində birgəyaşayış vəd edir.
Ümumilikdə Vətən müharibəsinin gedişatına bir daha nəzər yetirsək deyə bilərik ki, Azərbaycan 44 gün ərzində XXI əsr müharibəsi apararaq son dərəcə çətin bir şəraitdə qısa zaman ərzində ən müasir silahlardan istifadə etməklə, son dərəcədə yüksək ordu peşəkarlığı ilə “Qarabağ Azərbaycandır və nida” fikrini təsdiq etdi.
Bu Vətən savaşı dönəmində Ermənistanın müqavimətini ən çox sarsıdan zərbə məhz Şuşanın azad edilməsi oldu. Şuşa əməliyyatdan 24 saat sonra noyabrın 9-da Azərbaycan Ordusu daha 70-ə yaxın kəndi və bir qəsəbəni düşməndən təmizləməyi bacardı.
Şuşa şəhərinin işğaldan azad olunması ilə bir növ müharibənin taleyi həll olundu və Ermənistan qıza zaman ərzində biabırçı kapitulyasiya aktına imza atmağa məcbur oldu.
Şuşanın Azərbaycan üçün həddən ziyadə tarixi, mədəni və mənəvi əhəmiyyəti vardır. Mədəniyyətimizə böyük sənətkarlar, elmimizə böyük elm xadimləri, hərbimizə böyük qəhrəmanlar bəxş edən bir məkanın işğaldan azad olması yeni ümidlərin və arzuların yaranması, bütün Azərbaycan xalqının birliyini möhkəmləndirən əsas məqam idi.
Şuşanın azad olunması ilə bir növ bütün Azərbaycan yenidən doğuldu, yeni ümidlər yeni arzular yaranmış oldu.
Şuşanın azad olunmasından sonra ictimaiyyət qarşısında çıxış edən Prezident İlham Əliyev Şuşada keçirilən əməliyyatın dünya hərb tarixində xüsusi yer tutacağını da vurğulamışdı.
Azərbaycan xalqı işğal altındakı torpaqlarını geri aldı və birdəfəlik olaraq erməni təcavüzünə son qoydu. Artıq Azərbaycanın üçrəngli bayrağı işğaldan azad edilmiş torpaqlarda, o cümlədən Şuşada dalğalanır. Məhz bu amil milli birliyin sarsılmaz sütunlarından biridir.
Bölmənin digər xəbərləri
