Azərbaycanın turizm imkanları beynəlxalq sərgidə xüsusi maraq doğurmuşdur
Paris, 21 sentyabr (AZƏRTAC). Xəbər verdiyimiz kimi, sentyabrın 21-də Parisin məşhur “Port de Versay” sərgi salonunda dünyanın ən böyük turizm sərgilərindən biri hesab edilən “Top Resa2012 “ Beynəlxalq turizm sərgisi öz işini başa çatdırmışdır.
Dörd gün davam edən sərgidə Azərbaycanın turizm imkanları ətraflı nümayiş etdirilmişdir. Sərgidə ölkəmizi “Gilan turism”, “Geo Travel”, “Millennum turism and Congres DMS”, “SW travel” və digər şirkətlər təmsil etmişlər. “Azərbaycan Hava Yolları” Qapalı Səhmdar Cəmiyyəti ilk dəfə belə mötəbər sərgidə iştirak etmişdir.
Azərbaycan Mədəniyyət və Turizm Nazirliyinin təşkilatçılığı ilə 2009-cu ildən etibarən bu beynəlxalq sərgidə iştirak edən şirkətlər ölkəmizin turizm imkanları haqqında iştirakçılarda müəyyən təsəvvür yaratmaq məqsədi ilə stend dizaynına xüsusi fikir vermiş, respublikamıza ayrılan guşədə Azərbaycanın qədim tarixindən və mədəni abidələrindən, musiqi alətlərindən, gözəl təbiətindən bəhs edən broşürlar və digər ədəbiyyatlar, habelə videoçarxlar nümayiş etdirmiş, qonaqlara və iştirakçılara ətraflı məlumat verilmişdir.
Pier Dümas (sərginin iştirakçısı): “Mən təəssüf edirəm ki, Azərbaycanda olmamışam. Amma ölkənizə səfər etmiş dostlarımdan, çoxsaylı ədəbiyyatdan Azərbaycan barədə müəyyən məlumat almışam. “Eurovision-2012” mahnı müsabiqəsi ilə bağlı birbaşa Bakıdan verilən canlı yayım nəinki təsəvvürlərimi genişləndirdi, hətta ölkənizi sevməyə, səfər etmək həvəsimə səbəb oldu. Mən gələn il yayda mütləq Azərbaycana səfər edəcək, Qərblə Şərq arasında körpü rolu oynayan, qədim İpək Yolu üzərində yerləşən bu ölkə ilə yaxından tanış olacağam”.
Jan Şevalye: “Bu cür sərgilər hər hansı bir ölkənin turizm imkanlarını nümayiş etdirmək baxımından mühüm əhəmiyyət daşıyır. Guşəniz Azərbaycan barədə əldə etdiyim məlumatları daha da zənginləşdirdi. Mən hiss etdim ki, ölkənizin iqtisadi inkişafı turizmi inkişaf etdirməyə imkan vermişdir. Axı, bildiyimə görə Azərbaycan neft və qazla zəngin bir ölkədir.
Azərbaycanda olan dostlarım ölkəniz barədə çox danışıblar. Onlar bildiriblər ki, Azərbaycanın turizm imkanları olduqca zəngindir. Burada ölkənizdə turizm sektorunun inkişafına göstərilən qayğı barədə də məlumat aldım. Bu, sadəcə sözlər deyil, reallıqdır. Axı, Azərbaycan həm də tarixən qədim bir ölkədir. Deməli, onun abidələri də, mədəniyyəti də, incəsənəti də, daha çox xoşladığım mətbəxi də qədim olmaqla, həm də zəngindir. Buna mənim şübhəm yoxdur. Bir neçə dostumla qarşıdakı ildə Azərbaycana səfər etməyə hazırlaşıram. Bu səfərimdən razı qalacağıma inanıram”.
Azərbaycan guşəsinin sərginin ilk günündən maraqla qarşılanması heç də təsadüfü deyildir. Guşənin dizaynı və orada milli koloritimizin əks olunması sərgi iştirakçılarının diqqətini ilk dəqiqədən cəlb etmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
