Bu ilin ötən dövründə İsmayıllı rayonuna 70 min nəfərdən çox turist gəlmişdir
Bakı, 25 sentyabr (AZƏRTAC). Son illərdə Azərbaycanın dilbər guşələrindən olan İsmayıllı rayonunda turizmin inkişafı istiqamətində bir sıra mühüm layihələrin həyata keçirilməsi bu diyarın ölkəmizin cəlbedici turizm mərkəzlərindən birinə çevrilməsinə şərait yaratmışdır.
Rayon mədəniyyət və turizm şöbəsindən AZƏRTAC-a bildirmişlər ki, bölgədə turizm infrastrukturunun genişləndirilməsi sayəsində İsmayıllıya gələn turistlərin sayında ildən-ilə sürətli artım müşahidə edilir. Bunun nəticəsidir ki, əgər 2009-cu ildə rayona cəmi 15 min turist gəlmişdisə sonrakı illərdə, yəni 2010-cu ildə bu rəqəm 26 minə, 2011-ci ildə isə 59.500 nəfərə çatmışdır.
Bu ilin mayında Bakıda uğurla keçirilmiş “Eurovision-2012” mahnı müsabiqəsi ilə bağlı ölkəmizə gəlmiş çoxsaylı turistlərdən böyük bir qrupunun İsmayıllıda olması, bu ecazkar diyardan xoş təəssüratla ayrılması sonrakı mərhələdə, xüsusilə 2012-ci ilin yay turizm mövsümündə rayona indiyədək görünməmiş səviyyədə turist axınına şərait yaratmışdır. Nəticədə ilin ötən dövründə İsmayıllıya rekord sayda-70 mindən çox turist gəlmişdir.
Bölmənin digər xəbərləri
